new edku

بسم الله

تمر مدينتا العزيزة الغالية ادكو بمنعطف تاريخي قد ينقلها نقله لم يكن يتخيلها أشد الحالمين والمتفائلين ؛ هذه النقلة إن صح ما يُثار الآن عن مشروع ” التخطيط العمراني الجديد ” الذي قِيل أن المسئول عنه هو المهندس الإستشاري ممدوح حمزة – وكلنا يعلم قدر هذا الرجل وقدرته – الذي إن صح ما قيل عنه وسمعناه فقد ينقلها حقا نقله كثيرا ما تمنيناها جميعا ولمّا تأت .. ،

ماسبق كان مدخلا بإيجاز لعرض فكرة قد إقترحها عليّ أخي أبو بلقيس بإعادة نشر موضوع new edku الذي كنتُ قد نشرته في بدايات موضوعاتي المتواضعة في منتدى ادكاوي مع بداية تدشين موقع edku.net وجعلته – أي موضوع new edku – أول موضوعاتي تقريبا في المنتدى لأجعل بداية تفاعلنا بحلم وخيال نتمناه لمدينتنا التي كان هدفنا الأول من الموقع والمنتدى – ومازال – هو الإرتقاء بها بفكرنا وسواعدنا نحن أبناءها … ،

وقبلت اقتراح أخي أبو بلقيس بإعادة نشر الموضوع ولكن أردت أن أنشره مزيلا بجميع التعليقات والمداخلات التي كنت قد حفظتها معه لقراءتها بين الحين والآخر – لحاجة في نفسي – وها أنا أنشره بردوده وتعليقاته وبنفس أسماء أصحاب التعليقات ، كذلك التعقيبات كما هي .. ،

هذا وأتمنى منكم عدم الملل الذي أتيقن أنه سيزور الكثيرين منكم بسبب طول الموضوع وحجمه … وأخيرا أتمنى منكم نظرة للمستقبل تجمعنا دائما على خير و بخير لهذه المدينة التي كثيرا ما ضِقنا بها … ولها ؛ لكم مني كل الحب .

…………………………………………………

بسم الله
منذ فترة وأنا أود أن أكتب حلمي لمدينتي ادكو فمنعني خجلي ولكن وجدتني وانا أستمع لرائعة فيروز “شط إسكندرية يا شط الهوى … ” مشدود لأروي تخيلي لمدينتي إدكو رغم عشقي اللامحدود لحبيبتي الاسكندرية …،

رأيتني فيما يرى الحالم ” نازل من المشروع وانا جاي من سفر مش بعيد ، أول ما رأت عيني المحطة اذا بي أصرخ فين بتوع السمك يانهار كويس مش زحمة ولا بهدله ، رد عليا سريعا رجل المرور الذي يقف فقط ليشاهد التزام السواقين دون أي تعب منه : “البلد أتغيرت يا استاذ الادكاوية عدو القرن ده للقرن الجاي ، أدخل واتفرج ” انا بصراحه دعكت عنيا وقلت أكمل أهو البيت في وسط البلد لما أشوف ، دخلت شارع مجلس المدينة لاقيت معجزة رئيس المدينة “الشيخ نايم” واقف مع مساعديه بيتفقد أحوال التشجير في الشارع وبينوه عن نوع شجر جميل الشكل لازم تزين به الشوارع ، الله ! ايه ده هو صحي أمتى ؟! ، ببص عند مسعد رجب ألاقي الناس بتضحك مع بعضها على الزي الموحد ال لبسه صاحب المحل وعماله وكلامهم عن النظافه ، قلت أمشي أشوف فرن العدل ألاقي الناس والمحلات قدامه زي الفل ، أمشي أسمع ناس بتتكلم على الرصف الجيد والصرف الصحي الممتاز والكهرباء ال ماتقطعتش من سنه والمياة ال متوفرة ومافيهاش أي شوائب ، بدأت أكلم نفسي هو انا في ادكو بلدي ولا ادكو سيتي الامريكانيه ، شويه وأسمع واحد عضو في المجلس المحلي بيتكلم عن الانتخابات ال أفرزت ناس تدافع عن حق البلد وتطلب كل خير ليها وتحمي حق ولادها وده دليل عن وعي المواطن الادكاوي بأهمية صوته الانتخابي والشفافيه ال حصلت في الانتخابات والحرية في التصويت و… و… ، على طول وضعت يدي فوق أذني وقلت يارب أكون في الدنيا مش في مكان تاني ، شوية ألاقي حد راح مطبطب على كتفي وقال : متمو فينك يا أخي من زمان البلد محتاجه الشباب ال زيك ليه أتأخرت كنت فين ؟ فلان الفلاني بتاع المكان الفلاني .. بعد ما كان متبت في الكرسي سابه برضاه وقال لازم الدم الشبابي يكمل المسيرة ولازم تكون من الناس ال يتقدمو وعلى فكرة ده مش وحده ده كمان علان والاستاذ تتان وكل من كان زيهم ، كلهم كلهم أتغيرت أفكارهم المتحجرة وده بس علشان خاطر البلد أبسط ياعم ، قلت له انت واعي لكلامك معقول فلان الفلاني عمل كده ! ده مش راضي يسيب مجلس ادارة “…” ولا عضوية “…” من سنين فجأة كده اتغير قال لي لء ده بس علشان النفوس أتعدلت انت ما سمعتش عن عمك الحج فلان بتاع الحزب ال راح للأخوان في عقر دارهم علشان يتعاون معهم في موضوع الناس ال بيتخانقوا على ال يساعد في تطوير مستشفى ادكو ، قلت ايه !!!! يتنخانقوا على مين يساعد المستشفى ولا على مين يستولى عليها ، قال لي ياعم افهم البلد بتتحرك انت مش بتتفرج على القناة الاولى ولا ايييه؟ ، قلت ماشي ياعم براحة اظاهر اني مش من هنا ، مشيت معاه وقعد يكلمني عن الشوارع ال كان الناس وضعوا فيها فرشات وحاجات معطله السير فيه ازاي أوساعت بعد ما كل واحد من نفسه كده أخد حاجته وراح السوق ال وفره مجلس المدينة للباعة يتجمعه فيه علشان يريحو الناس ويفضو الشوارع ، وكلمني عن الناس ال بطلت تبني بيوت بدون تراخيص ولا بقه حد يبني باليل علشان المخلفات ولا بقه في شوارع مترين ومتر ونص ، كل الشوارع هتبقى 10 و 8 متر يعني شوارع بلدنا هتبقى زي الدولي يامتمو ، وكمان سمينا الأحياء اسماء جديدة تليق بالتغيير ، قلت له ياريت حي الشلبي يبقي اسمه الشلبي بلازا علشان واحد صاحبي عزيز عليا كان بيحلم بكدة ، رد بسرعة يا عمنا أحلام الشباب بقت عندنا أواااامر أوامر ، قلت له سيبني بقه أروح أشوف أمي عامله أيه في new edku أصل قلبها أبيض ورهيف ما يستحملش الحلاوة دي كلها ، مشيت وعديت على المجعرة فلم أتمالك نفسي من وقع المفاجئة ! القهوة ، ايوة القهوة بقت فرع لمكتبة الاسرة ، ناديت شاب بيدور على كتاب قلت له مش دي قهوة بح بح ، قال لي لء بح خلاص مابقاش في قهوة ، الناس بطلت تدخين وبتشرب عصاير طبيعية ، قلت له وانت بقى بتدور على ايه ؟ ، قال لي مكلفينا في المدرسة ببحث ولازم أجمع المادة العلمية بتاعته لأن المناهج اتغيرت وبقت بتعتمد على المشاركة وتنمية القدرات المعرفية لدى التلاميذ و…، قلت له عندك عندك فين ده في ادكو بس قال لء في مصر كلها انت ما تعرفش ان البلد اتحركت ولا ايه ، يا عم التعليم بتاعنا اتغير وبقينا زي الفل ، صرخت بصوت مش عالي علشان الضوضاء طبعا ” أمي فييييييييييين ” ومشيت بسرعة وقلت سلام عليكم وانا ماشي للناس وهي بتتناقش في كيفية معالجة الأمور بين العائلات بعيدا عن المركز والحكومة وضرورة القضاء على كل من لا يلتزم بالعادات والتقاليد واحترام الكبير وغيره ، دخلت البيت لاقيت أمي بتتكلم في التليفون مع رئيسة جمعية المرأة المنتجة وبتسألها ميعاد الاجتماع أمتى علشان تبلغ كل الستات صديقاتها في النادي الاجتماعي وتعمل حسابها في التبرع الجديد بتاع المستوصف الخيري لعلاج المحتاجين ، قلت لها انا جيت يا أمي ، بسرعة خلصت التليفون وقالت لي وحشتني والله يا أبني انا كنت خايفه عليك من التغيير والبلد ال أتحركت فجأة قلت لها لء ما تخافيش انا مش ناوي أكمل وأشرق لسوادة يمكن أتجن ولا حاجه انا هنام يمكن أصحى على القرن ال بعد الجاي ، قالت بس خلي بالك ياريت ما تنساش اذكار النوم ـ، تنام وتصحى على خير وتكون البلد أتحركت أسرع .، ”

لم أكن لأحلم بكل هذا وانا نائم ذلك لأني ممن ينام ولا يحلم .

…………………………………………

faris_el7op

ههههههههههههههههههههههههههههه
وحياتك ابقا اتغطى كويس واتاكد انك لابس البنطلون

sedar

والله موضوع راااااااااائع …….
بس انت حلمت كتير أوىىىىى مش براحة على نفسك شوية؟
أحلى حاجة حلمت بيها “الشلبى بلازا” أهى دى والله حاجة حلوة أوى ،الواحد كدا يكون أعد فالبيت وحواليه كل اللى محتاجه وكل إللى يخطر على باله ؛أنا عن نفسى مش هحتاج إنى أروح بقية إدكو كفاية عليّ”شارع الشلبى” لا لا أصدى “”””الشلبى بلازا””” !
بجد والله هو فيها إيه لما نحلم !!!وعلى فكرة ياجماعة والله ممكن حاجات من دى تتحقق مع مرور” السنين” يعنى مثلا كان فى شوارع كتير أوى مش مرصوفة صح؟ دلوأتى لوبصيت هتلاقى معظكها اترصفت ؛”ده على حسب إللى أنا شايفاه”
احلموا يا جماعة من حقنا إننا نحلم ومن يدرى قد يصبح حلم أحد منا حقيقة !!!!

الأمير الحيران

صحيح لية منحلمش هو مش معظم الإختراعات كانت فى البداية حلم يراود العلماء اكيد لازم نحلم “الشلبى بلازا ” “القائد جوهر سنتر” “العجمى مول” اكيد لازم نحلم عشان الحلم يبقى حقيقة

أبو بلقيس

اقسم بالله سوف يأتى هذا اليوم … سوف بأتى اليوم الذى تشرق فيه الشمس على مدينتنا ادكوووو
يدى ويدك وانت وانتى
وبنحبك يااااااااااااااادكو

sedar

والله ياجماعة أنا لقيت نفسى برد تانى بعد مشوفت رد “أبو بلقيس”
يا جماعة والله أكيد إدكو هتبقى جميلة أكتر مهى ، مش بجد هى جميلة ؟ أنا عن نفسى طول مأنا فإسكندرية بكون مشتاقة ليها بجد وبفرح أوى لما يقرب اليوم إللى هرجع فيه هنا لأن إدكو بجد عندى أجمل مكان ابقى مبسوطة فيه!! !!

ويلا بجد بحبك ياااااااااااااااا بلدى
“”””إدكو””””

متمو

بسم الله
قرأت ردود بعض الأعضاء على موضوعيnew edku وكنت في غاية الاستياء من أسلوب العضوfares el7obالذي لم يراعي فيه أي احترام للذوق العام ولا لحرية الرأي التي لا تجرح ولا تسئ لأحد ، وقد أشار علي بعض زملائي في ادارة المنتدى باستخدام صلاحيتي كمدير عام للمنتدى في شطب رده لكني آثر أن أتركه من باب حرصنا الشديد على حرية الرأي والتعبير ولأني أؤمن أن صاحب الرأي انما يعبر عن شخصيته ، و للأعضاء الكرام كل الحرية فيما يرون ويعتقدون ، وأؤكد لكم على سعة صدري لمختلف الآراء ولكن أرجو الالتزام بالزوق العام وعدم التجريح ..،
ولكم مني جزيل الشكر

كريزى

هى فيروز السبب اكيد…..

ضى القمر

جميل اوى اننا نحلم بمستقبل اجمل وصورة احلى لبلدنا وايدى فى ايدك بلدنا تبقى اجمل

الاء

بسم الله الرحمن الرحيم

لاشى مستحيل وكله على الله

فين ادكو من عشر سنين ولما لانحلم بادكو الجديدة نحلم ونحلم

بكره يبقى واقع باذن الله

faris_el7op

تعقيب

اولا انا مقصدتش انى استهزأ بيك او بكلامك ( قصدى حلمك ) اما معنى كلامى واللى اقصده هو اننا فى بلد مغضوب عليها من الراس الكبيره واى دعم بيجيلها بيتحول لاى مكان تانى فى الجمهوريه
ثانيا انا مش ممكن اغلط فى اى حد بس حبيت انى اقولك احلم حلم معقول لان مستحيل ده هيحصل لاسباب كتير اولها ان الادكاويه بيخافو يعملو اى حاجه يبان فيها ان معاهم فلوس واسالو كل الناس اللى فى البلد وده راى عام عموما انا مش مع الخياليه الزياده عن اللزوم ياريت نتكلم فى حاجات نقدر نحققها مش حاجات عمرنا ماهنشوفها لاحنا ولا احفاد احفادنا
وكلمه اخيره انا قولتلك اتغطى كويس مباشره لو انت قريت الردود اللى بتحييك فى الاول وبعدين تستهزأ بالكلام وبعدين فى الاخر يقولو موضوع جميل ويشكروك هتلاقى ان كل الردود استهزاء وشكرا

Hamoo

اولا يا اخ ممتو حمدا لله على السلامه
ويارب تكون وفقت فى سواده

وبجد بجد موضوع

يصحى النايم اللى مش واخد باله
وينيم الصاحى ويحلم فى خياله

فعلا والله

شر البليه ما يضحك

بس ليه بجد ليه ما نحلمش

برافو عليك والله يا ممتو

موضوع جميل جدا جدا خالص

مصطفى خميس كوزو

بصراحة انا كنت هاكتب زى faris بس هو سبقنى ياعم فى حاجة فعلا اسمها اننا ممكن نحلم بس يعنى مش للدرجة دى ده مايبقاش حلم ده جنون 00000000
عارف ليه لانى باحب ادكو كدة بسماكينها 00 بعربياتها 000 باهلها 00 بكل حاجة فيها 000 وما دامت مش عاجباك 000 خليك فى اسكندرية 000 جى تحسرنا على حالنا ليه 000 انما ادكو ربنا يخليها هى عاوزة شوية تظبيط فعلا بس مش زى مابتقول طيب العربجية دول اللى فيها شوفت لهم حاجة فى الحلم وبتوع الكاريتات 00 هاتعمل لهم ايه ؟؟؟؟؟؟؟؟؟؟ والسواقين والسماكين 0000 والموظفين بتوع مجلس المدينة اللى عاوز تشغلهم مش حرام عليك تتعبهم 00 منك لله ياشيخ نصيحة 00000 بلاش الاحلام اللى تودى فى داهية دى واتغ000000000 كويس

هاري بوتر

بعيد عن ادكو والشلبي بلاازا وبحبح!!! لأني مش من ادكو..

أحب احييك على الموضوع ده لأن بجد اسلوبك رائع ولو بجد الموضوع ده من خيالك انت .يبقى انت عندك موهبه كبيره بجد.

المهم براااااافو … وربنا يحققلنا احلامنا ومصر كلها تبقى كدا ..

مش بعيد نصحى الصبح نلاقي في النشره انهم غيرو اسم البلد بدل من مصر تبقى الولايات المتحده المصريه!!!!

محمود زيتون

بسم الله الرحمن الرحيم
مشكور يا متمو
اولا مش عيب ولا حرام ان الواحد يحلم وتتحقك احلام
ثانيا ان معظم الاشياء مرتبطه با الاحلام ومتوقف معظم الاشياء على الاحلام مش كلها طبعا

سهير

ادكو جميلة فعلا ولكن محتا جة منا اكثر واقعية ونعمل على توعية جميع افراد الشعب الادكاوى باهمية التعاون على تحقيق حلمنا لان الاحلام هى بداية الابتكار والاختر اع ولكننا لا نطلب سوى النظام فى كل شىءبداية طوابير العيش ويارب تتحقق جميع احلامنا

مالديني

و الله حلم جميل
نفسي كمان تتغير طباع بعض الناس للافضل
زي ما بنحلم تتغير شوارعنا و احيائنا للافضل
جزاك الله خيرا يا متموووووو
و ماشي ياعم هصرخ معاك و اقول
بحبك يا ادكووووووووووووو

الاء

بسم الله الرحمن الرحيم

احنا قلنا مفيش داعى نلوم الرجل على حلمه

ان ماكنش لينا فهو لابنائنا ان شاء الله

انا عشت فى الرياض مدة شفت فيها المولات والاسوق الشعبية

والعماير الشاهقةوالبيوت الشعبية اى بيوت من الطين البن

احنا قبل بلاد الخليج مصر تكون بالضمائر
اوالايمان بالله تكون جنة الله فى ارضه حت ى الحلم مستكترين الحلم ياجماعة الخير

الطير المهاااااجر

يعنى انتو كدة بكلامكم ده هتخلو ا اللي عنده راي ميقولش و لا حتى يفطفط باللى فى قلبة متزعلش يا متمو

مصطفى خميس كوزو

لا احنا مش بنحجر على الاراء الاحلام كل واحد له الحق يحلم باللى هو عاوزه ويتمنى اللى هو عاوزه لكن انا هارد بموقولة لعم احمد فؤاد نجم 00000
اعتقد انها بتعبر عن اللى انا عاوز اقوله وياريت الكل يفهم قصدى

طاطي راسك طاطي طاطي
انت ف وطن ديمقـراطي
طاطي راسك طاطي طاطي
انت ف وطن ديمقراطي
انت بتنعم بالحرية
بس بشرط تكون مطاطي

لما تكون شغال بذمة
خايف على مصلحة الأمة
شغلك يطلع من غير لازمة
علشان مبيعلاش غير واطي
انت ف وطن ديمقـراطي
طاطي راسك طاطي طاطي
انت ف وطن ديمقراطي
انت بتنعم بالحرية
بس بشرط تكون مطاطي

لما تكون شغال بذمة
خايف على مصلحة الأمة
شغلك يطلع من غير لازمة
علشان مبيعلاش غير واطي
طاطي راسك طاطي طاطي
انت ف وطن ديمـقراطي

لما حاميها يكون حراميها
وبلاده ورا ضهره راميها
طالع نازل واكل فيها
مسنود بالبدلة الظباطي
طاطي راسك طاطي طاطي
انت ف وطن ديمقراطي

لما شقاك يصبح مش ليك
فقرك سد السكة عليك
تتلفّت تلقى حواليك
إما حرامي وإما عقاطي
طاطي راسك طاطي طاطي
انت ف وطن ديمقراطي

لماتلاقي بلاد الدنيا
فيها البني آدم حاجة تانية
وانت في الطبقات الدنيا
قرد مسلسل أو وطواطي
طاطي راسك طاطي طاطي
انت ف وطن ديمقراطي

لما الجهلة يبقوا أمامك
أو فوقك ماسكين ف زمامك
ويسوقك ع الهلكة إمامك
تشرب م السم السقراطي
طاطي راسك طاطي طاطي
انت ف وطن ديمقراطي

لما الكلمة تكون بتدينك
لما تخبي ف قلبك دينك
لما الذل أشوفه ف عينك
هات إحباطك على إحباطي
طاطي راسك طاطي طاطي
انت ف وطن ديمقراطي

متمو

بسم الله
أذكركم بقول تعلمناه في مختلف مراحلنا التعليمية وانا على يقين به ” لا يأس مع الحياة ولا حياة مع اليأس ” ، ورحم الله مصطفى كامل

متمو

بسم الله
أولا أشكركم جميعا على ماقلتم من تعليقات أسعدتني ، وأحبطتني ، وأضحكتني ، وجعلتني أرى الأمور بشكل مختلف ، لكن دعونا نتفق أننا بحاجة لقوة دفع ، لسعي ، لأمل بنا ليس بغيرنا …، أقسم أني من أكثر البشر أحباطا على وجه الارض ، لا يكاد يتركني احباطي ، أتخلص منه بالكاد ، لكن أسعى وراء الحق وإن لم أدركه ، لذلك أدعوكم معي للنية ، نعم فقط النية الطيبة التي وإن متنا عليها فالله يثيبنا بها ، ولا تستكتروا علي حلمي ، وأنتظر من بعضكم ما هو أروع منه ،
وفي النهاية أذكركم بقول الله عز وجل ” إن الله لا يغير ما بقوم حتى يغيروا ما بأنفسهم ” .

feinak.habiby

ياريت يا جماعة كل واحد عاوز يحلم يحلم بلاش الردود السلبية والا كل واحد بقى ميحلمش .. متحلمش انك تحرر المسجد الاقصى وتكون انت واحد منهم صح ولا لا مين فينا مابيحلمش الحلم دة وعمار يا مصر

أبو بلقيس

رغم كل التعليقات السلبية من بعض الأعضاء إلا اننى حينما أمر على الموضوع أحب أقول بصوت عالى قوى !
بحبك يااااااااااااااااااااااااااااااااااااااادكو
يابلدى ياااااااااااااااااااااااااااااااااادكو

الدنيا حلوة

حلم جميل ممكن يتحقق
@
و ممكن لالالالا

لؤلؤه

بجد الحلم جميل اوى
وطبعا احلى حاجه فى الحلم هى الشلبى بلازا
وعلى را ى الاخت سيدار مش هبقى محتاجه اروح باقى ادكو
وبعدين يا جماعه احنا بنحلم عشان نحقق احلمنا مش نحبط بعض
متشكرين يا متمو وفى انتظار باقى الاحلام وركز على الشلبى

أبو بلقيس

لو سمحت اخى متمو ما تحذف الموضوع عشان ما بقاش حلمك لوحدك
وأقول لكل أعضاء المنتدى …..
كفايه احباط
لو سمحتم
اللى عنده كلمه حلوه يقولها

مصطفى خميس كوزو

اقتباس:
المشاركة الأصلية كتبت بواسطة متمو
بسم الله
أذكركم بقول تعلمناه في مختلف مراحلنا التعليمية وانا على يقين به ” لا يأس مع الحياة ولا حياة مع اليأس ” ، ورحم الله مصطفى كامل .
وانا اذكركم بقول تعلمناه فى الدراسة وانا على يقين به ” مافيش فايدة ” ورحم الله سعد زغلول

karkar

ياااااااااااااااجماااعة لو بطلنا نحلم نموت

الاسكندر الاكبر دخل اسكندرية وهي عبارة عن امواج تاْتي من كل مكااااااااااان

فما بالكم الان

عروس البحر الابيض المتوسط

وعلي فكرة البلاد كلها اعطت وجهه للبحر

فيما عااااااااااااااااااد ادكو اعطت ضهره

المهم ليها ما نحلمش ب newedku وحد كااااااااان يحلم في يوم من الايام ان احنا يكون عندنا

منتدي دمو خفيف علي القلب زي منتدانا الحبيب

فيها ايه لما نعلم ولادنا صح ازاي يحبوا بلدهم
ازاي بدل من كسر فروع الشجر في الشارع نحافظ عليها ونحاول نصونها

فيها ايه نعلم ولادنا بدل ما يكسروا اثاث المدرسة يحافظوا عليها علشان فيها اجيال هتقعد مكانه وبرده تحافظ عليه

اخواني المشكلة مش في ازاي نحلم المشكلة ازاي نبني الاساس صح قبل ان نحلم

ازاي يبقي عندنا مقومات البناء وازاي نرفع ونعلي ونشيد

وفق الله بلدنا ادكو الا ما فيها خير لاسعاااااد اهلها

وارجو الا اكون اطلت علي حضراتكم

تحيااااااااااااااتي

aboziadwtalal

اقتباس:
المشاركة الأصلية كتبت بواسطة karkar
ياااااااااااااااجماااعة لو بطلنا نحلم نموت

الاسكندر الاكبر دخل اسكندرية وهي عبارة عن امواج تاْتي من كل مكااااااااااان

فما بالكم الان

عروس البحر الابيض المتوسط

وعلي فكرة البلاد كلها اعطت وجهه للبحر

فيما عااااااااااااااااااد ادكو اعطت ضهره

المهم ليها ما نحلمش ب newedku وحد كااااااااان يحلم في يوم من الايام ان احنا يكون عندنا

منتدي دمو خفيف علي القلب زي منتدانا الحبيب

فيها ايه لما نعلم ولادنا صح ازاي يحبوا بلدهم
ازاي بدل من كسر فروع الشجر في الشارع نحافظ عليها ونحاول نصونها

فيها ايه نعلم ولادنا بدل ما يكسروا اثاث المدرسة يحافظوا عليها علشان فيها اجيال هتقعد مكانه وبرده تحافظ عليه

اخواني المشكلة مش في ازاي نحلم المشكلة ازاي نبني الاساس صح قبل ان نحلم

ازاي يبقي عندنا مقومات البناء وازاي نرفع ونعلي ونشيد

وفق الله بلدنا ادكو الا ما فيها خير لاسعاااااد اهلها

وارجو الا اكون اطلت علي حضراتكم

تحيااااااااااااااتي

يا جدع ياريت تطول كمان كلامك في الصميم يا كركر

شروق الشمس

بسم الله الرحمن الرحيم
والله حلم جميل يا متمو واسمحى لى أكمله خير اللهم اجعله خير سواده بقى اسمها أرض الأحلام وقالوأنا ماشيه رايحه المدرسه أولادى ماشيين باليونيفورم وجايين بنظام ودخلوا فصولهم مجهزين كتبهم ومستنيين الأستاذ ولقيت المدرسة مافيهاش عصايه واحدة والأساتذة مبيضربوش التلاميذ والمدرس قاعد يشرح لأولاده ويحكى لهم عن تاريخ ادكو عبر الزمن وقد ايه ادكو جميله وحلوه ووقت الصلاة أخدهم مسجد المدرسه علشان يصلوا وبعد كده وصلهم لغاية الباب وهوه بيقول لهم مع السلامه يا حبايبى مستنيكم بكرة ، وخرجت من المدرسة مروحة لقيت تاكسى وقف لوحده وبيقولى اتفضلى ووصلنى لغاية باب بيتنا ……………..وللحلم بقية

متمو

بسم الله
سعيد جدا بمشاركتك لي يا شروق وبقول ” ربك لما يريد قلب العاصي يسلم وعيونا هتتكلم ولا شئ يبقى بعيد , ربك لما يريد الصعب بيتهون والحزن بيتلون طول ما الأيد في الأيد ” بس على فكرة هذا لم يكن حلم بل خياااااال

مصطفى خميس كوزو

خليكم احلمو 000 بكرة هاتصحوا تلاقوها والعة ان شاء الله

وانت كمان ياعم محمد يامنير انت احلم براحتك

بس افتكر اللى انا قلته

fathitayloun

يا شباب لازم الكل يحلم ومن غير حلم منعرفش نعيش
لازم يبقى عندك امنيات عامه وامنيات خاصه
لانك من غير كده صدقونى متبقاش حياه
ومثلا هو فى حد يتوقع ان كان يبقى فى منتى باءسم ادكو
ووالله انا واحد من استغربت لما عرفت ان فى موقع باءسم ادكو
وفوجئت لاكن متعرفوش انى فرحت كتير واقولك قولت لاصدقائى هنا فى العمل شوفى
وطبعا كل عمل كويس او خبر كويس عن بلدك انا بفخر بيه
وخاصه لما تكون خارج مصر
وقولكم حاجه فلا مث شائع يقول محدش يعرف مقام امه الا لما يجرب مرات ابوه
وفعلا مش حتحسوا بجمال وحلاوه مصر ومدينتك الا واذا اتغربت
والله مصر مفيش اجمل منها
وكلنا هنا بنحب اغنيه وبنغنيها على اغنيه ل حسين الجسمى وهى – بحبك وحشتينى
ياشباب بصراحه لازم نحلم واحنا احسن من غيرنا
كل عام وانتم بخير
بمناسبه العام الهجرى الجديد احسن حد يفهم غلط

انتهى .. وننتظر الرؤى .

Advertisements

17 تعليق

  1. ان الله لايغير ما بقوم حتى يغيروا مايانفسهم تحتاج ادكو الحبيبة الى وعى فى شتى المستويات الثقافى الاجتماعى السياسى الاقتصادى وفتح المجال امام القيادات الشبابية المتعلمة والمثقفة منها على الاخص مع الاخذ بالاعتبار خبرةمن سبقهم من المخلصين القدامى 00

  2. شكرا لكل مخلص امين يحب وطنه وبلده ويتطلع الى ما هو جديد ومفيد م سعيد قشيوط من السعودية

  3. بسم الله

    استاذ سعيد .. سعيد جدا بزيارة حضرتك لمدونتي المتواضعة وأتمنى أن نكون عند حُسن ظنكم دائما .. و حقا تحتاج الأمة كلها لوعي بقيمة عقول أبنائها وتسخير هذه العقول لما يفيد وينفع الوطن بطاعة الله عز وجل أولا ثم إخلاص العمل .. مرة أخرى جزاك الله عني خيرا .

  4. نشكرك اخ متمو على الترحيب بزيار تى لموقعكم الكريم على ان تسمحوا لى ان ادعوا المثقفين من مستخدمى النت من ادكو وغيرهم الا يبخلوا بالكتابة الهادفة التى تساهم بشكل فعال فى تقدم ورقى المدينة والتسلح بكل ماهو جديد ومفيد فى شتى المجالات . شكرى وتحياتى

  5. مش عارف اقول اي
    بس انتوا بجد عايشين الدور

  6. لا حوله و لا قوة الا بالله

  7. السلام عليكم جميعا يشرفنى ان اشارك اخوانى فى رقى مدينتنا الغالية ادكو والحمد لله ان بلدنا مليئة بابنا ئها المخلصين وادكو تشهد نهضة كبير فى ظل السياسة الحكيمة تحت رايه السيد الرئيس محمد حسنى مبارك اطال الله فى عمره

  8. السلام عليكم يسعدنى ان اشارككم موقعكم الكريم والذى يحس على نهضة مدينة ادكو والحمد لله بفضل الله اولا وابنا ادكو تشهد ادكو نهضه تطوير فى جميع المراحل والاتجهات وزاللك بفضل الساسة الحكيمة فى عهد السد الرئيس محمد حسنى مبارك اطال الله فى عمره

  9. i hope that Edku will be better than this and out of bad people who are famous

  10. ياجماعة خلينا في الانخبات بتاعة مجلس الشعب

  11. عيزين نخلص من الكبوس الي علي صدرنا دا بصراحة الي حد من ادكو احسن من الراجل دا بلا شعلان بلا خرة دا كام يوم اسود يوم ما شفناه

  12. عايزين نوحد كلمتنا ونقف ع محمد عبد الله بلاش خلفات بلاش كلام فاضي كفاية محمد عبد الله احسن من غيروا
    وهو اكتر واحد يستحق الوقفة يلا يارجالة عايزين نشوف الهمة عايزين الراجل الي اسمه ظالم شعلان دا يغور بقا في الف دهية ونشم نفسنا وقف حال الاراضي وضمر الدنيا حرام والله حرام

  13. وياريت الجماعة الي يخدوا فلوس منه يستمروا ويخدوا الي هما عيزينوا بس الي في القلب في القلب محدش يزعل من كلامي الي يعرف يخد فلوس يتوكل علي الله ويخلص نفسه الي عندكم احسن من الي عنده سعيد شعلان بيفرق فلوف بس خلي بالك اوعي تتصور ولا تتسجل لا دول اف من لدعتهم دكتوراه في الخيانة وملهمش لا فتحة ولا يمين يعني بلاش تخليه يحلفلك علشان دا حالف علي المصحف ميقول كلمة صدق كل كلمهم كدب في كدب الحاجة الوحيدة الصدق عنهم هي الفلوس بس انشاء الله سنتهم سودة

  14. إســـــــتغاثة أهالى إدكو / بمحافظة البحيرة
    ***
    السيد الرئيس / محمد حسنى مبارك ( رئيس الجمهورية )

    تحية طيبة .. وبعد
    يستغيث أهالى مركز ومدينة إدكو / بمحافظة البحيرة – بسيادتكم لحمايتهم هم وأسرهم وأولادهم من إنشاء شركات للبترول والبتروكيماويات على الجزء المتبقى من شاطئ إدكو والواقع أمام الكتلة السكنية للمدينة ولا يفصلها عن الكتلة السكنية سوى مائة متر فقط هى عرض وحرم الطريق الدولى الساحلى .. وهذا الجزء هو المتنفس الوحيد لمحافظة البحيرة على ساحل البحر الأبيض المتوسط وعلى الطريق الدولى الساحلى وإليه يلجأ مواطنى مراكز المحافظة والمحافظات الأخرى خلال فصل الصيف لتمضية بعض الأوقات التى ينفضون فيها عن كاهلهم أعباء الحياة ، ورغم الإمكانيات المتواضعة للمصيف حيث أنه يوجد به عدد ثلاث شاليهات وعدة كبائن مصنعة البوص والخامات البيئية ودورة مياه – فإن هذا المصيف يعتبر مورد دخل جيد للوحدة المحلية خلال فصل الصيف ، فماذا لو أن المحافظة كانت لها إهتمامات سياحية وأقامت المئات من الشاليهات وأمدتها بوسائل الترفيه اللازمة ووسائل المواصلات التى تنقل إليه المصطافين من أنحاء المحافظة ، فإن هذا المصيف سيكون مصدر دخل قومى وكبير للمحافظة وسيغير من وجه المحافظة التى عرفت بأنها محافظة زراعية فقط ( لكن إهتمامات المسئولين بالمحافظة لا تنظر إلى الجانب السياحى ) وكل همها وشاغلها أن تتخلص من هذا الشاطئ وهذا المصيف مقابل بضعة ملايين من الدولارات من إحدى الشركات البترولية لتخصص لها مئات الأفدنة وليذهب المواطنون إلى الجحيم ولتذهب البيئة إلى الفناء ولتذهب صحة الإنسان إلى المراكز الصحية المختلفة لتعانى الأمرين فى العلاج من الأمراض الخطيرة .

    كما أنه سبق ورود خطاب من الهيئة العامة للتخطيط العمرانى – إلى السيد محافظ البحيرة بتاريخ 18/7/2000 يفيد بإيقاف أية تخصيصات بشاطئ إدكو لإقامة مشروعات للغاز الطبيعى حرصاً على التنمية العمرانية لساحل إدكو .. إلا أنه تم إغفال هذا الخطاب وتم التخصيص لشركة إسالة الغاز وللشركات الأخرى .

    ورغم ذلك سبق تخصيص مساحة 125 فدان لشركة شمال العلمين ورفضت وزارة البيئة ( مشكورة ) إقامة الشركة على شاطئ إدكو – إلا أننا فوجئنا بأن شركة بى بى بريتش بتروليم ( المتسببة فى التسرب النفطى فى خليج المكسيك ) تقوم بعمل مسح لمساحة 150 فدان من هذا الشاطئ فى المنطقة المواجهة للكتلة السكنية ( وهو نفس المكان الذى رفضت وزارة البيئة إقامة شركات للبتروكيماويات وإقامة شركة شمال العلمين عليه ) .

    مع العلم بأن ضحايا البقعة النفطية في خليج المكسيك في احدى الولايات الاكثر تضررا من الكارثة قد أجبروا القضاء الفيدرالي على محاكمة بريتش بتروليوم (بي بي).

    علما بأنه قد حضرت إلى إدكو لجنة وزارة البيئة بتاريخ 25/12/2002 وتقدمت بتقرير أوصت فيه برفض إقامة مشروع للبتروكيماويات فى نفس المكان المواجه للكتلة السكنية لما يتمتع به من مقومات طبيعية يجب إستثمارها سياحيا .. كما صدرت تقارير من لجان وزارة البيئة تفيد بتلوث مياه البحر نتيجة المخلفات التى تلقى من شركات إسالة الغاز الموجودة على شاطئ إدكو مما أدى لنفوق الكثير من الأسماك وأم الخلول .

    كما أن هناك تكليفات للسيد /رئيس الجمهورية للحكومة بالحفاظ على البيئة – فى إجتماعه الموسع لبحث أستراتيجية العمل البيئى حتى عام 2017 – وقد نشرت هذه التكليفات بصدر صحيفة الأخبار يوم 29/5/2002 بالعدد 15638 والتى يحذر فيها من إقامة أى مشروعات تؤثر على البيئة قرب الشواطئ أو المناطق السياحية والأثرية ( وهو ما ينطبق على شاطئ إدكو السياحى المتخم بالآثار والطوابى البحرية ) .

    إلا أن المسئولين فى محافظة البحيرة إما أنهم لا يعلمون شيئاً عن هذه التكليفات وإما أنهم يعلمون ويضربون بها عرض الحائط ، ونحن نربأ بالمسئولين بالمحافظة أن يضربون بتكليفات السيد رئيس الجمهورية عرض الحائط .

    كما أن هذا المكان يعتبر مصدر رزق لأكثر من عشرة آلاف صياد هم وأسرهم – حيث يمارسون فيه مهنة صيد السمك وأم الخلول بعد أن أستولت شركات البترول عن ما يقرب من عرض ثلاثة كيلومترات من عرض الشاطئ كانت تستغل فى الصيد .
    ..//..
    ..//
    -2-
    ونحن نتساءل ألا يوجد فى المحافظة غير أراضى وشاطئ إدكو للتفريط فيها بهذه السهولة وبعد أن كانت مساحة أرض الشاطئ 1800 فدان أصبح الجزء المتبقى والمحصور بين الطريق الدولى جنوباً والبحر شمالاً وشركات البترول شرقاً وأرض جمعية ضباط الشرطة غرباً لا يتعدى 400 فدان هى الملاذ الوحيد والمتنفس الوحيد لأهالى محافظة البحيرة من كافة المراكز بعد أن إقتطعت شركات البترول والطريق الدولى والأمن المركزى وجمعية ضباط الشرطة والميناء البحرى ما يقرب من 1400 فدان من البر وإقتطعت شركات البترول مساحات شاسعة من المسطح المائى للبحر يمنع فيها الصيد .. ورغم ذلك لم تستفيد المدينة وأهلها من هذه الشركات سواء بالإرتقاء بالبنية الأساسية أو بتعيين العمالة لتعويض أهالى المدينة عما يصيبها من أضرار بيئية أو إقتطاع أجزاء كانت مصدر رزق لأولادها فى الزراعة والصيد ، وقد عانى المزارعون أشد المعاناة هذا لعام من فناء لمحاصيل أساسية مثل الجوافه وغيرها من الفواكه من جراء الأكاسيد والأبخرة المتصاعدة من تلك الشركات …. ونحن لسنا ضد الشركات والمشروعات القومية ولكن يجب أن لا يكون ذلك على حساب صحة ورزق المواطنين الكادحين .. وهناك بدائل أخرى كثيرة ومنها أنه يوجد أكثر من 15 كيلو متر ( منطقة صحراء ) بطول الشاطئ تقع بين مركزى إدكو ورشيد وبعيداً عن الكتلة السكنية لكل من مركزى إدكو ورشيد ، يمكن إقامة أية مشروعات بها دون الإضرار بأحد ، ولكن الغريب أنهم يصرون على إقامة هذه المشروعات أمام الكتلة السكنية لمدينة إدكو وفى مكان لا يفصله عن الكتلة السكنية سوى عرض الطريق الدولى .

    إننا نستغيث بسيادتكم لوقف أية تخصيصات لشركات بترول أو غيرها على شاطئ إدكو والتنبيه على محافظة البحيرة بسرعة إستغلال هذا الشاطئ سياحياً بإقامة العديد من الشاليهات وإمداده بالمرافق ووسائل المواصلات اللازمة وتنميته وإعداده للسياحة البيئية لوضع المحافظة على الخريطة السياحية وليكون مصدراً رئيسياً للدخل القومى وللحفاظ على البيئة من التلوث .

    هذه إستغاثة أهالى إدكو نرجو من الجميع إرسالها لرئيس الجمهورية ورئيس الوزراء ووزير البيئة – لكى نحمى بلدنا من الخطر الكبير الذى يحيط بنا من أثر هذه الشركات الضارة بالبيئة .

  15. متى يتحقق , أتمنى أن اكون موجود لمشاهدة هذا الحلم

  16. جيد احب هذا ولكن اريد ان اقول كلمه باختصار ان ما نحن فيه الان من تخلف وعدم نظام هو ان نحن نجيد وضع الاحلام والخطط ولكننا لا نجيد تطبيقها فكل حلم فى الكون مكون من شقين ( الدراسه & التطبيق ) واذا لم توجد واحدة منهم لن يتحقق هذ الحلم . وبصراحه عندنا الدراسه الجيده ولكن ينقصنا التطبيق الجيد وكيف يكون عندنا تطبيق جيد ولم يخطر فى بال احد منا ان يتعلمه مع غياب اللماده التطبيقيه عن كل شئ فى حياتنا وارجو التدبر فى ان تكون الماده التطبيقيه هذه من المواد الاساسيه فى المدارس والجامعات وفى كل شئ حتى فى المساجد فنتعلمها ونلحق بما فاتنا من حياه
    اعذرونى على الاطاله ولم اقصد الاسائه الى احد مهما كان هو
    ان اريد الا الاصلاح ما استطعت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: