فرحة في زمن قلت فيه الفرحة .

 

يااااااااااااااااااه ! غريب أمر المواطن المصري ! رغم كل الاحباطات والسواد والكوارث المحيطة به من الممكن أن يفرحه أشياء بسيطة جدا لمجرد أنها تثير وطنيته أو شعوره بالنصر ولو كان في كرة القدم ،

” بقول كده بعد ما حصلنا كلنا أو أغلبنا من المصريين بعد مباراة كرة القدم بين فريقنا القومي وفريق الكاميرون في بطولة الأمم ، الفوز ال حققناها رغم انه في بداية البطولة الا انه أثر فينا بشكل كبييييير قوي حتى لو كان التأثير ده لحظي ، لكن أثر قوي بجد ، انا بقول كده لاني كنت واحد من ال اتأثروا بشده رغم ما انا فيه من حسرة على غالي وقلق على أمر أجده مصيري وقلق على امتحانات الدبلومة وعكننة من ال بيحصل لأخوانا في غزة وأكثر من هذا الكثير والحمد لله ، رغم كل ده لحظة ما رجعنا من صلاة العشاء ووجدنا الهدف الاول يسكن شباك الكاميرون نسينا الدنيا وال عليها ، أيوة والله انا على الأقل نسيت كل الدنيا وركزت في قصت شعر زيدان وأهدافه الرائعة وضحكة الحضري وقلق حسن شحاته ولسان أوتوفيستر ال لسه طالع من أيام الزمالك – ييييييييييي ايه ال جاب سيرة الزمالك هنا !!!! ؟- كل ده ركزت فيه ، والأغرب من كده اننا كنا قبل المباراة انا وخالي وأحد أصدقائي بنتناقش حول تصرف القيادة المصرية مع الفلسطينيين على معبر رفح الحدودي ودبينا خناقة لرب السما –نقاشية يعني ليس أكثر- لأختلافنا حول تعامل القيادة مع المشكلة وانا كنت مهموم جدا بشكلنا واحنا رافضين نحتضن ولاد عمنا ونساعدهم ، وكمان تصرف القيادة الذي لم يكن بالقدر الكافي وكنت أرى ضرورة وضوح رد الفعل بسحب سفير او تهديد بقطع علاقات أو أي رد فعل عملي على الاقل علشان ديننا لو مش علشان الفلسطينيين ال بيتخانقوا على السلطة وكنت حاسس ان كلام بوش بتقديرة للقيادة المصرية التي طالما نصحته ودلته على الطريق الصحيح وكلامه عن دور مصر القيادي وال الذي منه … كنت شايف ان الكلام ده كان بيسجدنا به الريس بوش علشان نسكت على افعال اليهود الملاعين .. ، المهم أرجع وأقول اننا كنا بنتكلم في كل ده قبل المباراة وما أن بدأت المبارة لم نعد نتذكر أي مما قلنا قبلها ، اللهم الا بعد الهدف التاني همست في أذن صديقي دون أن يسمعني أحد وانا أبتسم : يطلع عين غزة ، وضحك وضحكت انا وآاااااااااااه من الضحكة دي والله ما كنت أقصدها لكن أهو في وسط الفرحة هرتلنا بيها وهو كمان فضحني وسيح قدام ال كانوا قاعدين معانا ، المهم يعني اننا كنا مركزين قوي في المباراة ومع كل هدف تلقائيا انا كنت أقفز من مكاني سواء من على الكرسي او كنت واقف وأصرخ بعلو صوتي : الله أكبر ولله الحمد كل جون على كده ماعدا الهدف الرابع كنت تعبت من كتر التنطيط فما نطتش ههههههه واكتفيت بالحمد لله ، والله كل ده حصل وأكتر منه من ال كانوا معي في القعدة الجماعية وال كانوا في كل مكان في مصر وظهر ده من خلال شاشات التلفزيون ال بينت فرحة الناس بعد المباراة دي ، بس انا كنت دايما فاكر حد غالي عندي وبقول اكيد هو كمان فرحان ومبسوط واكيد ضحكته ماليه مكان قعدته والله افتكرته برضو وما نسيتهوش …. ، كل ده أستوقفني بعد المبارة وبعد ما فرحنا وهديت .. انا حسيت اننا –المصريون- طيبين قوي وغلابة جدا وأي حاجه بسيطة تلهينا وتفرحنا وتخلينا مظقطتين وده مش عارفه صح ولا غلط ، وكتير قلت لنفسي رغم اني مش بشجع الاهلي وأحب انه يخسر دايما لكن لما بيكسب بقول يمكن ربنا بيعوض البسطاء دول به عن ال هم شايفينه في دنيتهم والله وده بيصبرني على فوزه ، لكن احنا شعورنا ده مش غريب عن العالم لان العالم كله مهتم بالكرة وبيتأثر بيها وبيفرح كده برضو ويمكن أكتر مننا لكن الغريب هو حالنا ال لا يسر عدو ولا حبيب وحجم المعاناة ال بيمر بيها أغلب الشعب المطحون ده والغريب برضو هو انا لأني بطلت أهتم بالكرة خالص –الله يسامحك يا زمالك انت ومرتضى منصور- لكن مع المنتخب أعود للوراء 7 سنوات أيام ما كنت أحد أشد المتعصبين كرويا …. “

في النهاية كانت فرحة بسيطة وقصيرة في زمن قلت فيه الفرحة .

Advertisements

رد واحد

  1. انا كمان كتير بسأل نفسى ياترى ولع المصريين بالكورة ممكن ينسينا اى مشكلة وما اكثر مشاكلنا , بس بجد لما بيجى جووووون واسمع تهييص الناس كلها من حولى بضحك بجد لانهم ممكن يبكوا من شدة الفرح وده بيحصل فى مواقف كتييير , انا وقت المباراه كنت بقرا رواية رائعة وكانت اخدانى اوى وكل ما يجى جوون واسمع الناس اقول ربنا يفرحهم اكتر وبصراحة كانت جامدة اوى اربعة اهداف ولولا ان جيرانى كلهم من مصر وماحدش من الكاميرون كنت فكرت حاجة تانية ويارب يفرحنا كلنا بس فرحة تدوم معانا وتغطى كل اوقات الحزن يارب …………

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s

%d مدونون معجبون بهذه: